සංකලිත රන්තාරු 2026

හලාවත ආනන්ද විද්‍යාලයීය ද්විතීයික අංශයේ දරු දැරියන්ගේ ප්‍රෞඪ සංස්කෘතික ප්‍රකාශනය සහ සෞන්දර්යාත්මක පෙළහර විදහා පෑ "සංකලිත රන්තරු 2026" කලා මංගල්‍යය පසුගිය ජූනි 26 වනදා හලාවත සුදසුන ශාලාවේදී අති සාර්ථක අන්දමින් පැවැත්විණි. පාසල් වේදිකාවෙන් ඔබ්බට ගිය සැබෑ කලා ලොවක අසිරිය ප්‍රේක්ෂක ජනතාව වෙත සමීප කරවමින්, වාර ද්විත්වයකින් (පස්වරු 2.30 සහ 6.30) වේදිකාගත වූ මෙම ප්‍රසංගය නරඹන්නන්ගේ නෙත් සිත් පැහැරගැනීමට සමත් වූ අමතක නොවන සැඳෑවක් බවට පත් විය.
ප්‍රසංගයේ නර්තන අංශය දේශීය මෙන්ම බටහිර රිද්මයන්ගේ අපූර්ව එකතුවකින් වර්ණවත් විය. සාම්ප්‍රදායික උඩරට, පහතරට සහ සබරගමු නර්තන සම්ප්‍රදායන්ගේ ගාම්භීරත්වය මෙන්ම නවීන පරපුරේ රිද්මයන්ද මනාව මුසු කරමින් සිසු සිසුවියන් ඉදිරිපත් කළ රංග වින්‍යාසයන් ප්‍රේක්ෂකාගාරය අමන්දානන්දයට පත් කළේය. වේදිකාව මත ඔවුන් දැක්වූ අතිශය නම්‍යශීලී සහ සුසංයෝගී නර්තන චලනයන් ද්විතීයික අංශයේ දරුවන් සතු අසිරිමත් නර්තන ප්‍රතිභාව ලොවටම කියා පෑවේය.
එමෙන්ම, ප්‍රසංගයේ සංගීත අංශය දෙසින් ඇසුණු මධුර ස්වර රටා ප්‍රේක්ෂක ශ්‍රවණේන්ද්‍රිය මුළුමනින්ම පිනවීමට සමත් විය. විවිධ සංගීත භාණ්ඩ වාදනයන්ගෙන් සහ දක්ෂ සිසු සිසුවියන්ගේ ඒකල හා සමූහ ගායනාවන්ගෙන් වේදිකාව බෙහෙවින් හැඩ ගැන්වුණි. සම්භාව්‍ය සංගීතයේ සිට නූතන සංගීත රටාවන් දක්වා වූ ඉතා සියුම් සංගීතමය සුසංයෝගයන් ප්‍රසංගයට එක් කළේ වෘත්තීය මට්ටමේ සජීවී සංගීත අත්දැකීමකි.
නාට්‍ය අංශය දෙසින් ඉදිරිපත් වූ සුවිශේෂී රංගනයන් ප්‍රේක්ෂකයා හඬවමින්, සිනස්සමින් මුළු මහත් වේදිකාවම ග්‍රහණය කර ගැනීමට සමත් විය. ද්විතීයික අංශයේ දරුවන් සතු සහජ රංගන කුසලතාවන්, හැඟීම් ප්‍රකාශනය සහ වේදිකා පරිණතභාවය එම නාට්‍යමය ඉදිරිපත් කිරීම් හරහා මැනවින් සනිටුහන් විය. වෘත්තීය මට්ටමේ නළුවන් අභිබවා යමින් දරුවන් වේදිකාව මත දැක්වූ මෙම උපරිම ආත්ම විශ්වාසය ප්‍රසංගය නැරඹීමට පැමිණි සැමගේ ඉහළම ප්‍රශංසාවට පාත්‍ර විය.

මෙම අභිමානවත් ප්‍රසංගයේ සමස්ත නිවේදන කටයුතු විද්‍යාලයීය මාධ්‍ය ඒකකය (Anandian Media Unit) මඟින් ඉතා සාර්ථකව මෙහෙයවනු ලැබූ අතර Society) මෙම ප්‍රසංගයේදී ආනන්දීය ඡායාරූප සංසදය (ACC Photographic Society) විසින් නවීන තාක්ෂණික ක්‍රමවේද මෙන්ම උපාංග යොදාගනිමින්, Led Screen ඇතුළු තාක්ෂණික කටයුතු මැනවින් මෙහෙයවමින් පැමිණි ප්‍රේක්ෂකයින් හට නවමු සහ වෙනස්ම ආකාරයේ රසවින්දනාත්මක අත්දැකීමක් ලබා දීමට සමත් විය.

දරුවන්ගේ මෙම සැඟවුණු කුසලතාවන් හඳුනාගෙන, ඒවා ඔපමට්ටම් කරමින් මෙම දැවැන්ත ප්‍රසංගය සාර්ථක කර ගැනීම පිටුපස සිටි දැවැන්තම ශක්තිය වූයේ අප විද්‍යාලයේ ගරු විදුහල්පතිතුමන් ඇතුළු ද්විතීයික අංශයේ ආදරණීය ගුරු මණ්ඩලය සහ සෞන්දර්ය අංශයේ ගුරුභවතුන්ය. දරුවන් වෙනුවෙන් නිදි වරමින්, අප්‍රතිහත ධෛර්යයෙන් හා කැපවීමෙන් යුතුව මඟපෙන්වූ සියලුම ගුරුභවතුන්ට අපගේ හෘදයාංගම ස්තූතිය පුද කරන අතරම, මෙම කලා මංගල්‍යය සාර්ථක කර ගැනීමට නොමඳ සහයෝගයක් ලබා දුන් දෙමාපියන්, ආදි ශිෂ්‍යයන් ඇතුළු නන් අයුරින් සහාය දුන් සැමටම විද්‍යාලයේ බෙහෙවින්ම ස්තූතිය පුද කර සිටිමු.