ඉන්දීය Seth M. R. Jaipuria පාසලේ නර්තන කණ්ඩායම දිවයිනට: හලාවත ආනන්ද විද්‍යාලයෙන් උණුසුම් පිළිගැනීමක්

දිවයිනට පැමිණි ඉන්දීය නියෝජිත පිරිස, හලාවත ආනන්ද විද්‍යාලයේ විදුහල්පති G. A. C. ගුණසිරි මහතා, නියෝජ්‍ය විදුහල්පති ගයාන් ආරියරත්න මහතා, ආචාර්ය මණ්ඩලය සහ සිසු දරුවන් විසින් ඉතා උණුසුම් අන්දමින් පිළිගන්නා ලදී.

ආධ්‍යාත්මික හා සංස්කෘතික වැඩසටහන්

දිවයිනට පැමිණීමෙන් අනතුරුව සංචාරයේ පළමු අදියර ලෙස ඉන්දීය නියෝජිත පිරිස ඓතිහාසික කළුතර බෝධීන් වහන්සේ වන්දනාමාන කිරීමට එක්වූහ. එහිදී ලැබූ ආධ්‍යාත්මික සුවය සහ සාමය පිළිබඳව සිය සන්තෝෂය පළ කළ ඉන්දීය පිරිස, මෙම අගනා අවස්ථාව ලබා දීම වෙනුවෙන් හලාවත ආනන්ද විද්‍යාලීය බලධාරීන්ට සිය ගෞරවනීය ස්තූතිය පිරිනැමූහ.

අනතුරුව බේරුවල බුද්ධසිරි මහා විහාරය වෙත පැමිණි එම පිරිස, විහාරස්ථානයේ ඇති සුවිශේෂී බෞද්ධ කලා නිර්මාණ දැක විශ්මයට පත් වූ අතර, විහාරාධිපති නායක ස්වාමීන් වහන්සේ විසින් එම කලා නිර්මාණවල ඉතිහාසය සහ කලාත්මක වටිනාකම පිළිබඳව ඔවුන්ව දැනුවත් කිරීමට කටයුතු කළහ.

මෙම විශේෂිත අවස්ථාවන් සඳහා හලාවත ආනන්ද විද්‍යාලයේ ආදි ශිෂ්‍ය, කළුතර දිසාපතිතුමන් ද සහභාගී වීම විශේෂත්වයකි.

ආනන්ද විද්‍යාලයීය ඡායාරූප සංගමයට ඇගයීමක්

මෙම සමස්ත නියෝජිත පිරිසේ පැමිණීම සහ සංචාරක අවස්ථාවන් ආවරණය කළ හලාවත ආනන්ද විද්‍යාලයීය ඡායාරූප සංගමයේ (Ananda College Photographic Society) කාර්යක්ෂමතාව, තාක්ෂණික මට්ටම සහ උසස් ගුණාත්මකභාවය පිළිබඳව ද ඉන්දීය පිරිස සිය ඉහළ ප්‍රශංසාව පළ කළහ.

සතියක සංස්කෘතික හුවමාරුවක්

සතියකට ආසන්න කාලයක් මෙරට රැඳී සිටින මෙම ඉන්දීය නියෝජිත පිරිස, ශ්‍රී ලංකාව සහ ඉන්දියාව අතර සිසු දරු දැරියන්ගේ නර්තන කුසලතා, සංස්කෘතික සබඳතා සහ අධ්‍යාපනික අත්දැකීම් හුවමාරු කරගැනීමේ අරමුණින් සංවිධානය කර ඇති විවිධ වැඩසටහන් රැසකට ඉදිරියේදී එක්වීමට නියමිතය.